|
جولييت بدر
|
|
2007-05-28 |
ال ما شم عمرو
زهرة الليمون
اللي معبّقة بالعطر
كل الكون
شو عرّفو بالشم
شوعرّفو بالضم
شو عرّفو بالنوع والا الكم
شو عرّفو بالحب؟
شو عرّفو
بلهفة شغاف القلب
والسحر
بالمشوار فوق الدرب
والنرجس النعسان
جنب وجنب
شو عرّفو بالوشوشة
وبوسات الغصون
بصهيل الفرفشة
والنحل من بخور مريم ينتشي
ونيسان من قطر الندي
عم يرتشي
ال ما شاف بِ عمرو
زهور اللوز
والا الجمال اللي عشق
فروع الجوز
ال ما شاف
لون شقيّق النعمان
ال بتغار
من خد الحلو الخجلان
وشوية فراشات
بتلوّن البستان
والزيزفون الشارد التكيان
وال ب ِنتعش ويفيق
مع خيوط الشمس
شو عرّفو بالهمس
شو عرّفو بالأنس
شو عرّفو برعشة شعور اللمس
ال ما راح وتمرجح
بحضن الغاب
وما شاف الحساسين
وقت غياب
وماانضم للمّة وللأصحاب
شو عرّفو بالود
شو عرّفو
بتعبير لون الورد
شو عرّفو بالجرد
شوعرّفو
بالصيف رعش البرد
شو عرّفو؟؟؟
جولييت بدر- (زهرة الليمون)-
هذا الإميل محمي من السرقة عبر برامج السبام، تحتاج إلى دعم جافا سكريبت لتستطيع رؤيته
|
