|
جولييت بدر
|
|
2007-05-18 |
ازرعني متل شلح زنبق
متل غيمة
متل نسمة
متل موعد على مفرق
والا متل نبرة صدا
مع المدى
تحرس خيالك كل ما تمرق
أو متل
خرزة بخيط المسبحة بيدّك
إذا بدّك
اشلحني ع بيدر ضيعة الأحلام
متل تلة سنابل قمح حليانة
بالشوق
بالإحساس مليانة
بالحب تنشر أجمل الأنغام
وتغفى عناقيد الحلا على زندك
إذا بدّك
ازرعني بهيكل حب بالمحراب
متل الصلا
بقلب الفلا
تراتيل تصدح, يرجع اللي غاب
بعد فرقة
بعدْ حرقة
يتلملموا الأحباب
وينطر حنيني, تفيق ويشدّك
إذا بدك
اشبكني بقميصك حلقة المحبوب
تنحني وتسجد
وتصلّي تتعبّد
تعانق حلاك, ترافقك ع دروب
وتقطف رحيق الورد من خدّك
إذا بدّك
كان الهوى بقلبك متل طوفان
شلال عم يخدق
ينبوع عم يدفق
وكانت مشاعر صادقة وبركان
ضاع الهوى
زاد النوى
وبعدك ياوجد بتنتظر ألحان؟
اتركني سياج الشوك ع حدّك
إذا بدّك
جولييت بدر- (إذا بدك..)-
هذا الإميل محمي من السرقة عبر برامج السبام، تحتاج إلى دعم جافا سكريبت لتستطيع رؤيته
|
