الله رمى نقطة عطرْ
فتحت براعمها زهرْ

تناثرت حَوْلا النجوم
وتناغمت صارت ضهرْ

فوق الضهر وقفت 
بنت
حورية من قلب البحر
جن البحر
 مغروم فيها
لمّن حكمتو بالهجرْ

قابيل كرمالا قتل
خيّو عغفلة وانقهرْ
وقبرو يابيّي ما كبرو
موجود بالضيعة القبرْ

فيروز عَ دروبا لقت
طيّونها وغنت شعرْ
حتى الشمس بكسوفها
ضحكت لها احمرّت خفرْ
لما لمع برق البَرَد
من  مبسما
ببسمة ثغرْ
متل ليلى
متل عبلة
معشوقة من قبل الدهرْ
وملحمة عشق وغرام
بالمجد سطرها الفخرْ
أنا بنتها
هَيْ ضيعتي
حد السما
براس السطرْ
بكتاب تكوين الحياة
أحلى وأغلى من التبرْ
فيها السحرْ
نور الفجرْ
عَ تلالها بيغفى البدرْ
وهيي الجسرْ
وحدا الجسرْ
ما بين الله والبشرْ

الوادي غفي ع طرافها
يسجُد صلا لترابها
يقدّم قرابين العشق
حارِس حقولا وغابها

يدعي لربو يحرسا
ويبعد عن جفونا الأسى
ويزيدها محبة وجمال
تَ تشعّ صبحية ومسا

بتحيطها كروم الجمال
مزهّرة وكلا فرح
الصبايا.. تروح وتجي
متل الفراشات بمرح
تقطف من كروم الحلا
لفتات مغزولة بقزح

وكبارها ...
متل الدهرْ
عتااااااااااااااااق 
كل واحد سِفرْ
بيحكو حكايات الزمن
وكيف مضّوا ايام العمرْ
شو عذبوهن الدرك
ليشاركو بحرب السفرْ
شو تشنشطوا !!!
شو تمَرْمَروا!!!
شو داقوا تعذيب وقهرْ

ضيعتنا عشقاني السَهَرْ
والفن من عنا انتشرْ
حتى الزهر ..
حتى الشَجَرْ
بتوشوَشو بضَوْ القمرْ
بيتغازَلوا .. بيتراقصوا
بيسَيْهرونا للسَحَرْ

---

جولييت بدر- (كومة عطر)

خاص: "نساء سورية"