ياااااه شو حلو الخيال
بتشوف حالك عالقمرْ

بتقطف عن سطوحو زهرْ
تمشي ع َ وشّ المي
تتنزّه ...
وأصعب أمر سهل المنالْ

بتعيش بقصر/ الرشيد /
تشوف الجواري والعبيد
فوق التكايا والحشا
و/ زرياب / يعزفلك قصيد

تسمع رأي/ للخيزُران /
تحكم وتؤمُر بالأمان
/النواس / ينثر جوهرو
بين الجموع بعنفوان

/عَروب / تصدح بالنشيد
تتغلغل بحبل الوريد
/ المأمون /جالس عالعرش
يسمع علم للي بيريد

تسمع غرايب ببغداد 
عن شهريار و شهرزاد
تاخد نصيب  علي بابا
وتغامر مع/ السندباد /

هَيْدا جزء ضمن الخيال
كلو سحرْ كلو جمال
وترجع من الحلم الحلو
يتردد بنفسك سؤال

كيف ضيّع الأحفاد
هالعزّ الحلو
كلو اندثر من آخرو لأوّلو
/ الواثق / عشق ...
 عشقو زنخ ...
ومعشوقو كان / مُهَج / الوسخ
وتسارعت بعدو أمور
خلت مجدهم ينسلخ

لو ترجع شوي لْوَرا
بتعرف شو صار
وشو جرى
وكيف ضيّعو المجد العظيم
شي عالغلمان
شي عالمرا 

---

جولييت بدر- (طعم الحلا)

خاص: "نساء سورية"