شفت القمر سهيان
بعيونو حكي

ومغرغرة بالدمع
قصدو يشتكي
قرّبت صَوْبو
لمست كتفو هَيْك
متل الفراشي
حد زهرة ملبّكي

لك يا قمر
كلك سحر..
لولاك ما كان الشعر
لَيْش ياعمري اِنتْ
ِحزنان؟؟
ياريت أعرف يابدر
من شو الحلو زعلان؟

لَيْش الزعل ياوهج
بعيون البشرْ
يا حلم..يا خيمة عشق
يا عطر.. يا لون العُمُرْ
لَ تكون زُهرة رفيقتك
مالت لَغَيْرَك شي سَحَرْ؟

والا شي غَيْمي مارقة
رشّت عليك ورودها
بللت تَوْبَك ندي
بدّلت نورك عتم
وحَرْمِتنا السَهَرْ ؟

مليون ؟..شو مليون
أكتر من ملايين
وعدّ أد مافينك سنين ؟
شوعمار!..شو دهور!
شو عشاق تعبانين
تكيو عَ أحلامن غفوا
وانتْ بترشرش حنين

ريت الزعل ما كان..
يا رفيق السهر
كنّو القمر زعلان..
بيخسفنا القهر
ماعاد رح  بيطل
 عَ بَيادِر الانسان
ويغيييييييب
ويتهرهر عشق
عن شجرة الأحلام
عن زهرة الأنغام..
عن الحيطان
ويبطّل أمل
ووعود حلياني
وتغيب بالنسيان

عشتار.. يا عشتار
يا رفيقة العشاق
ليل نهارْ
شوفي القمر..
شو مزعّلو؟
لَيْش مش مشتاق
ليش العتم خيّم
 عَ كل الدار
وحياة عينك يابدر
من كتر مابحبك بقول
لطلة حبيب العُمُر:
يا طلة قمر

---

جولييت بدر – (طلة قَمَر)

---

خاص: "نساء سورية" 

---