صار الرمادي
 مغلف الألوان..

لون الشَفَق..
لَوْن الغَسَق..
لون السَحَر...
حتى الشَجَر..
وزهرة الرمّان...
           ------
صنوبرتنا هرت وراقا
وتكوّمت أحزان..
وريح الشمال الهايجة
الحاملي معها عذر
أبشع من النكران
خلّعت كل شي حلو
أخدت معا البسمي
وضحكات مرتسمي
انحفرت عَ وجّ البدر
مواج البحر
ووراق الشجر...
وسرسب عُمُر
مابين أ فراح وقهر
وحلاوة  اللي  كان.....
        ----------
بعلمي الصنوبر دايم الخضرة
تاري الحقيقة تبدّلت
لا الفرحة دامت
لا الأمان..
لا الحب...
لا الإخلاص...
لا اللهفي...
ولا الحنان..
وتغيّرت لهجاتْ
شو تغيّرت !!!!
حتى الطبيعة...
تبدّلت..
ماعاد طحلب
عاش عالحيطان
كان السنونو يرقص
بعشو
ويزق لفراخو..
حبة ورا حبة
هج ّ وتركنا وراح
وهجرت معو محبّة
كان العشق بيزهّر البستان
 ويفجّر الآهات
من قلب القصب
وحنيّة الرعيان
شو بقول  ع َ اللي كان؟
وين ضاع يللي كان؟؟؟

جولييت بدر – " شو تبدّل ب هالكون؟!"

---

خاص: "نساء سورية" 

---