أحلى مسا

بهاك المسا ال أحلى مسا
صوتَك وصِل
متل السحر
متل الفجر
رشرشت عَ الدنيا عطر
ومتل الفراشي بلمسا

بوقتا شمسنا الهايمي
غرغرو عيونا دمع
وغطست لتسبح ساهمي
نادت بلهجي ناعمي:
يَ هالانسان مين ما كان
روحي الك تنفسا

بْ هالوَقت
انت ياروحي طرّزت
توب العشق
توب الوله
من خيوط همسك
وانتبَه
عقلي لقربَك وانتسى

كل التعب
كل القهر
كل الشعور
بوحدتي و بعزلتي
اللي كرّسا

همّ القضايا الواهمي
تقل الفروق العايمي
عَ سطوح عمري
واكتسى

من الخوف حلّي كالحة
من الوجع
طعمي مالحة
هيدا غريب
ما بيسوى تحكيه بغزل
شو عرّفو بدربك
حتى لعنوانك وَصَل؟
بس القلب ما بيعترِف
الفروق عندو مخرّسا

صوتك بشرياني انغرس
وهمسك تغلغل بالنفس
شو الحل يا كل البشر؟
ليش الفوارق نغرسا؟

جدّي وجدّو حاربو
دياب الفلا وتقاربو
ونبتي عَ كتفن برعمت
عطيت زهور ولوّنت
زهرة اِنت
زهرة أنا
شو جَدْ حتى تفارقو
وتباعَدو وتخانَقو
وبضل بدي اسألُن
لَيْش البعد؟ لَيْش الأسى

قَوْلك بيعطوني جواب؟
ما بظن
يمكن في عتاب
ويمكن خناق... وضرب
شو الْ فَوّقك عَ هالحكي؟
شو في؟.. شو مخبّا ؟
ومنو بتشتكي
هَيْدا القَدَر
هَيْدا الأمر
هَيْدا ما ممكن ينتسى
*******

شو رجّعِك

شو رجَعِك؟
هلأ فطنْتِ باللي كان
ال مجّدك كل الزمان
يمكن ما فيّ اقبلِك
ويمكن ما أقدر امنعِك
بتتذكّري؟؟
أدّيْش حمّلتِك حنان
وأدّيْش من روحي
غمرتِك بالأمان؟
زهّرْت ورداتِك
وحرَست غفواتِك
وسهرت تَ تنامي
يا نَبْض أيّامي
وبعدِك عَ عاداتِك
ياريت فيّ أرفعِك
فوق الشجن
فوق الخجل
وتخاطبيني  وأسمعِك
انت حياتي ودنيتي
انت ملاذي بغربتي
لو تعرفي طعم الحزن
طعم الشقا
طعم العذاب بعزلتي
وتشاركيني وأقنعِك
شو بحب اني اقنعِك
بتعرفي؟؟
قلبي رجف
وجدي لَهَف
لما لمحْتِك وبشغف 
مع اني ياعمري نَويت
ارفض نداك ورجّعِك
لكن حنيني خانني
وركعت قدّام الجمال
قدّم قرابين الغزل
أعطيك ِروحي ومتعِك
فوتي عَ قلبي
تربّعي
بدَرْب الغرام تسكّعي
بملكك عرش الحياة
وجوّا وَريدي بودَعِك
ياه شو بهلْوِس حكي
وبتلبّك وبكتم بكي
وأنت بغرور ووَلْدَني
بتتشَيْطني وبتضحكي
ياريت فيّ أكرهِك
ومن وريدي أنزعِك
شو رجّعِك؟؟؟؟؟؟؟