|
جولييت بدر
|
|
2006-07-03 |
خاص: نساء سورية رح خربش شوية حكي
عم اغزلو
ورح طرّزو
من جناح نحلي ملبّكي
من فراشي هامت بالحقلْ
حامت عَ زهرة ملوّني
تسألها : وينِك
شو بك ِ
من السوسني الْ عشقت قمر
وخلاها تدمن عالسَهَر
سهيت بلحظة عالوَتَر
وراحت بغفوة تتكي
من البيلساني الهايمي
ومن ملمستها الناعمي
تنطر حبيبا الْ ما اجا
متلهّفي للتكتكي
والياسميني الخايفي
تهرهر عشق عَ شفايفي
وتقلّي : ليكي شايفي ؟
ومن شلح زنبق تشتكي
هَوْدي ياعمري رفقتي
بيوشوشوني عالهدا
روحي لعندو بشي مدى
لا تسألي ما في حدا
ولا تنسي زهر الليلكي
روحي متل كرج الحجل
لا تطلعي فَوْق الجبل
خليك حدّو...ساهريه
هوّي عَ طيفك مرتكي
الدرغل بِ وَرزِك غزل
والنحل بِ لملم عسل
وآهااااااااات تحلم بالأمل
منّك ياروحي وما تمل
تا تقول : هَوْ كلن لك ِ
الحسون فَوْق دراجنا
تكتك بنغمي حالمي
لرفيقتو الْ عَ سياجنا
يندَهْلا : يالله عجّلي
ناطر أنا
لا تتركيني
تحرّكي
متل الحجل
متل النحل
متل الفراشي العاشقة
متل الزهر
كل العُمْر
رح ضل حبك وانتظر
وهيدا سلوكي ومسلكي29/6/2006
|
