خاص: "نساء سورية"

---

حبيت أكتب بالقلم
              والقلم عبوس السطر مشتّف
 
بيرقص وما بدو نغم
                بيهز خصرو بكف
 
بيمشي على نقلة قدم
                بالدم خاواه الألم
 
مظلوم عمرو ما ظلم 
                كره الكذب واللف
 
حبيت قدملو حكي 
                ع دهور ملياني بكي
 
لم الحكي ع المرتكي 
                وبنهم مني سف
 
صار يتقلّب معي 
                ومع كل وجدانو وعي
 
وصاح يا عين دمعي 
                ما عاد بدي رف
 
بدّي من فصول السني 
                في كل صرخة تعتني
 
وتعجن الحب بمعجني 
                وكل الشعب يلتف
 
يا قلم كثّر ع المحبة سطور
                وافتح بواب مغمغمة ع النور
 
يا قلم بعدك بالركن مهجور
                والحبر منك جف
 
يا قلم ع الكلمات وديني 
                فيها صراحة عن مضاميني
 
يا قلم ما بدك تعزيني 
                وتقول عنّا كان وحدة صف
 
يا قلم وين المرحلة منّا 
                وين المحبة في محافلنا
 
أوعى تقول البارحة كنّا 
                هَدا الحكي عرقابنا ملتف
 
يا قلم وديني على المريخ 
                قبل ما ابني وابنو يشيخ
 
شد بقساوة كثّر التوبيخ 
                حاجي الجهل ع الجهل ينقر دف

26/6/2005